fallorka8619315a

Fallorka fær listaverk að gjöf

Tue, 23 May 2023 13:00:43 GMT

Helgi Jóhannesson fyrrum forstjóri Norðurorku gaf á dögunum Fallorku málaða mynd af Glerárvirkjun 1. Myndina málaði Jónína Björg Helgadóttir myndlistakona fyrir Helga árið 2013 og hefur hún síðan prítt skrifstofu forstjóra Norðuroku. Þegar myndin var máluð átti Norðurorka virkjunina en hún er nú í eigu Fallorku. Helga fannst því rétt að Fallorka eignaðist myndina nú þegar hann hefur látið af störfum.

Fallorka þakkar Helga kærlega fyrir gjöfina.

Súlur Vertical fjallahlaup í blíðskaparveðri

Thu, 05 Aug 2021 10:59:10 GMT

Fallorka þakkar öllum hlaupurum fyrir komuna og vonast til að sjá sem flesta aftur í hlaupinu á næsta ári.

Síðastliðinn laugardag var haldið á Akureyri Súlur Vertical fjallahlaupið og voru þátttakendur vel á fjórða hundrað þrátt fyrir að margir hafi hætt við vegna Covid. Veðrið lék við hlauparana því að sólin skein allan daginn og útsýnið á hlaupaleiðunum naut sín til fulls. Þrjár hlaupaleiðir voru í boði í hlaupinu en þær eru 18 km, 28 km og í fyrsta skipti var boðið uppá 55 km hlaup með um 3.000 metra hækkun.

Fallorka er stoltur styrkaraðili Súlur vertical en allar leiðir eru ræstar frá Kjarnaskógi, fara að sjálfsögðu upp á eða að Súlum. Á leiðinni í mark fara þær svo allar eftir stígnum norðan Glerár sem kenndur hefur verið við Fallorku og framhjá stöðvarhúsi nýju Glerárvirkjunar. Þar náðust ljósmyndir af flestum hlaupurum með tind Ytri-Súlu í baksýn sem er vel við hæfi. Hér fylgja myndir frá Pedromyndum af sigurvegurum í hverri vegalengd í hlaupinu. Við óskum þeim til hamingju sem og öllum þátttakendum því að það eru allir sigurvegarar sem áræða að takast á við löng fjallahlaup og ná að ljúka þeim. Miklu fleiri myndir má sjá á Facebook síðu hlaupsins Súlur Vertical .

Endamarkið var svo í göngugötunni á Akureyri og þar var flott stemming allan seinnipartinn á meðan hlauparar voru að skila sér í mark og uppskera lófatak og hvatningu áhorfenda.

Öll úrslit í hlaupinu má sjá á tímataka.is

Fallorkustígurinn

Mon, 21 Jun 2021 15:07:14 GMT

Árið 2018 var Glerárvikjun II virkjuð. Stöðvarhúsið hefur ekki farið framhjá flestum Akureyringum en það er staðsett við Glerá þorpsmegin, á móti Möl&Sand. Stíflan er þar ofar í Glerárdal en glöggir hafa kannski séð glitta í hana á leið sinni upp Hlíðarfjallsveg.

Í kjölfar uppsetningu virkjunarinnar stóð Fallorka fyrir og kostaði stíg meðfram ánni sem síðan hefur verið mjög vinsæll meðal gangandi, hlaupandi og hjólandi fólks. Stígurinn liggur frá stöðvarhúsinu, upp að stíflunni, yfir hana en þaðan er hægt að velja hvort haldið er niður að bílastæðinu við Súlur eða áfram upp að Lamba ofarlega í Glerárdal.

Frá komu stígsins, árið 2019, hafa ófáir lagt leið sína eftir honum, að minnsta kosti að hluta, og jafnvel skipulagðar ferðir gerðar innan ýmissa hópa, til að mynda göngu-, vina- og fjölskylduhópa sem er mikið gleðiefni. Vinsældir hans fara vaxandi með hverjum deginum og má nefna að hlaupaleiðin í Súlur Vertical hlaupinu fer eftir stígnum að hluta.

Stígurinn er 7 km langur frá stöðvarhúsinu upp að stíflu og um 9 km frá stíflunni að Lamba, hann hentar því einstaklega vel í sunnudagshreyfinguna.